Mylius Erichsenip timaata sumiissusaa eqqoriarneqarpoq

Ilisimasassarsiorlutik ajunaartut, Mylius-Erichsenip angalaqataatalu Høeg-Hagenip timaat, Tunup avannaani Ingolfip kangerliumarngani, Wegenerip qeqertaata kangisinnerusortaaniissasut, timmisartortartuusimasup, sakkutuut naalagarisimasaata, maanna oqaluttuarisaaneq pillugu ilisimatuup, Paul E. Ancker-ip oqaatigaa.
Allattoq Louise M. Kleemann
aggustip 22-at 2008 10:00

Danskit kalaallit peqatigalugit 1906-imiit 1908-p tungaanut ilisimasassarsiorneranni Mylius-Erichsen Høeg-Hagenilu tammarput, ilaasalu Danmarkimut uternerinit aqagu ukiut hunnorujunngortorsiorneqassapput.

Ilisimasassarsiortut pingajuata kalaallip, Jørgen Brønlundip timaa 1908-mi nassaarineqarmat ilaasa timaat sumi nassaarineqarsinnaanersut ullorsiutaani atuarneqarsinnaapput. Taamanili taakku marluk timaat ujarneqartaraluaramik suli nassaarineqanngillat.

Jørgen Brønlundip ullorsiutaasa misissornerisigut namminerlu timmisartortarallarami misilittakkani naapertorlugit, Paul Ancker isumaqarpoq Brønlundip nassaarineqarfianiit avannamut 160 kilometerisut ungasitsigisumi, Wegenerip qeqertaani Mylius-Erichsenip Høeg-Hagenillu timaat nassaarineqarsinnaassasut.

Arktisk Institutimi ilisimasassarsiortoq, Janni Andreasen oqarpoq, ilisimasassarsiortut sukkut ingerlasimanerat ilisimaneqanngimmat Anckerip sumiiffiliinerata eqqortuunissaa ilimaginngikkaluarlugu eqqoriaasutulli allatut soqutiginartigisoq.

Tamanna Wegenerip qeqertaanut ilisimasassarsiornikkut aatsaat qulakkeerneqarsinnaavoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq