Mylius-Erichsen Høeg-Hagenilu pillugit ilimagisat nutaat
Mylius-Erichsenip Høeg-Hagenillu timaat siornatigut ujarlerfiusarsimasuninngaanniit illusinnerusumiissimassasut, timmisartortartuusimasoq, sakkutuut naalagarisimasaat, maanna oqaluttuarisaaneq pillugu ilisimatooq, Paul E. Ancker oqarpoq,
Danskit kalaallit peqatigalugit 1906-imiit 1908-p tungaanut ilisimasassarsiorneranni Mylius-Erichsen Høeg-Hagenilu tammarput, ilaasalu Danmarkimut uternerinit ullumi ukiut hunnorujunngortorsiorneqarput.
Ilisimasassarsiortut pingajuata kalaallip, Jørgen Brønlundip timaa 1908-mi nassaarineqarmat ilaasa timaat sumi nassaarineqarsinnaanersut ullorsiutaani atuarneqarsinnaapput. Taamanili taakku marluk timaat ujarneqartaraluaramik suli nassaarineqanngillat.
Jørgen Brønlundip ullorsiutaasa misissornerisigut namminerlu timmisartortarallarami misilittakkani naapertorlugit, Paul Ancker isumaqarpoq Brønlundip nassaarineqarfianiit avannamut 160 kilometerisut ungasitsigisumi, Wegenerip qeqertaani Mylius-Erichsenip Høeg-Hagenillu timaat nassaarineqarsinnaassasut.
Arktisk Institutimi ilisimasassarsiortoq, Janni Andreasen oqarpoq, ilisimasassarsiortut sukkut ingerlasimanerat ilisimaneqanngimmat Anckerip sumiiffiliinerata eqqortuunissaa ilimaginngikkaluarlugu eqqoriaasutulli allatut soqutiginartigisoq.
Tamanna Wegenerip qeqertaanut ilisimasassarsiornikkut aatsaat qulakkeerneqarsinnaasoq aamma oqaatigaa.
Danskit kalaallit peqatigalugit 1906-imiit 1908-p tungaanut ilisimasassarsiornerannut tunngatillugu Illu Atlantikumi saqqummersitsineq oktobarip ulluisa 26-ata tungaanut ingerlasussaq ullumi aggustip ulluisa 24-anni ammarneqassaaq.
