Myanmarimi taasinerit naatsorsorneri aallartipput

Tusagassiuutit naalgaaffimmit aqunneqartut oqaluttuarput inuit nuannaartut kiffaanngissuseqartullu qinersiartukaasimasut, nunalli tamat aallartitaat akerlerluinnaanik oqaluttuarput.

Tuluit Burmami aallartitaata toqqaannartumik oqaatigaa: Kiffanngissuseqartumik qinersisoqanngilaq aamma qinersineq eqqortuunngilaq.

Aamma taama oqarpoq USA-p præsidentia Barack Obama kiisali EU-p nunanut allanuut pisortaa Cathtrin Ashton.

Burmami, aamma Myanmarimik taaneqartumi, qinersineq tassagaluarpoq ukiut untritillit affaani sakkutuut pissaaneqarnerannik taamaatitsineq. Kisianni sakkutuut naalagaasa qinersinermik paasiuminaatsumik inatsisiliornikkut qulakkeerniarsaraat demokrati maangaannassaanngitsoq ukiut 20-t matuma siorrnatigutut, taamanikkut demokratimik anguniagallit qinersinermi ajugaarujussuarmata. - Kingornagut qinersineq atorunnaarsinneqarpoq.

Inatsisartuni inissat 25 procentii sakkutuut naalagarsuinut illikartinneqareersimapput, naatsorsuutigineqarporlu inissat sinneruttut partiinut marlunnut sakkutuuni naalagaasimasunit aqunneqartunut ingerlassasut.

Sakkutuut aqutsinerata inuit ullormi qinersinermi nukillaartippaat, tamma qallunaaq arnaq Burmami najugalik oqaluttuarpoq.

Una qinersineq imatorsuaq persuarsiutaanngilaq. Ippassaq qinersineqarmat suna tamarmi nukillaangasutut ingerlavoq.

Kisianni nukillaanganerup akornani soorlu neriuummik ersittoqartoq, arnaq qallunaaq taama oqarpoq.

Maani inuit najugallit oqarput ungasinnerusoq qaninnerusuunngitsoq isigalugu demokrati eqqunneqariartussasoq.

Uani arnaq oqaaseqartoq kinaassutsiminik isertuussiumavoq Myanmarimi atorfini tigummiinnarniarlugu.

Aamma soorlu ullaaq oqaluttuarigipput Myanmarip kangissortaani sakkutuut aqutsisut innuttaasullu ikinnerussuteqartut akornanni aammik kuisinertalimmik akersuuttoqarpoq, ullumikkumut inuinnaat pingasut akersuunnermi toqutaasimapput.