Myanmarimi naalakkersuisut akimmisaartitsinerat ingasagigaat

Myanmarimi sakkutuut kisermaassillutik naalakkersuisuusut Naalagaaffinnit Peqatigiinnit sakkortuumik isornartorsiorneqarput. Tassa kiattup anorersuata kingorna annattut ikiorniarlugit Myanmarimut iserniaraluartut kisermaassillutik naalakkersuisunit akimmisaartinneqarmata.
Allattoq Louise M. Kleemann
maajip 09-at 2008 07:57

Ajunaartunik ikiuiniartunik nunamut iseqqusinnginneq oqaluttuarisaanermi siumorneqarnikuunngitsoq Naalagaaffiit Peqatigiit ullumi nalunaartut, aviisi Politiken allappoq.

Myanmarip sakkutuut kisermaassillutik naalakkersuisut nunamik tiguaanngikkallarmata, Burmamik taaguuteqartup, nunarsuarmioqatigiit ikiuiniarlutik saaffiginnissutaat allakkatigut qujaruppaat.

Ajunaarnermi ikiorsiineq nassiussinikkut pippat ajunnginerpaavoq, inuit ikiorniakkat tikinngikkaluarlugit, Myanmarimi sakkutuut kisermaassillutik naalakkersuisuusut allapput.

Myanmarimi ikiuiniarlutik nunamut iserniartunut timmisartullu minnisaannut akuersissutit piniarneri ajornakusoorput.

Kisermaassillutik naalakkersuisuusut nammineerlutik ikiuutinik agguaannissartik aalajangiusimavaat, nunarsuarmili ikiuiniaqatigiiffiit assigiinngitsut ikiuutit nassiussuunneqartut pisariaqartitsisunut anngutinngitsoornissaat annilaanngatigaat.

Ikiuniaqatigiinnit Røde Korsimeersut tallimat ullumi Myanmarimut tikipput, taakkua ilagaat Danmarkimi Røde Korsip pisortaa Anders Ladekarl, aamma ajunaarnersuaqartillugu ikiuisartoq qallunaaq, Uganda-mi maannamut ikiuilluni sulisimasoq.

Myanmarimi inuit 62.000-it ajunaarsimanngikkunik maqaasineqarput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq