Myanmarimi mattuttoq ataaseq ajunaarpoq

Myanmarimi mattuttoq ataaseq akerliussutsimik takutsinermi ajunaartoq nutaarsiassaqartitsiviup AFP-p tassa taavannguaq nalunaarutigaa.

Myanmarimi sakkutuut, nunami naalakkersuisuusut, mattuttut innuttaasullu allat akerliussutsimik takutitsisut avissaartinniarlugit, anaatat gassilu qulliliornartoq ullaarli atulerpaat.

Akerliussutsimik takutitsisut sakkutuullu aporaatilernerat, siornatigut Burmasimasup illoqarfiisa pingaarnersaanni Yangon-ini buddhasiortut qinusarfissuisa annersaanni Shwedagon-ip silataani pivoq.

Nutaarsiassaqartitsiviit Reuters AP-lu nalunaarput, silaannarmut eqqartoqartoq gassillu qulliliornartut katersuussimasut akornannut miloriussuunneqalersut, maannamullu 80-it tigusaasimapput.

Sakkutuut naalakkersuisut piumasarisimagaluarpaat inuit aqqusinerni ataatsimuussagunik amerlanerpaamik tallimaasassasut. Taamaakkaluartoq ippassaq ippassaanilu 100.000-t katersuuttarput.

Innuttaasut unnuami aneqqusaannginnerat aqqusinernilu angallannissaannik killilersuinerit ullunik 60-inik sivisussusilerneqarpoq.

Nutaarsiassaqartitsiviit maanna nalunaarput,

mattuttut inuinnaallu 1.000-t missaanniittut Yangonimi illoqarfiup qeqqata tungaanut maanna aallartut.

Taakkulu nillerrattuarput. ”Sianeersooqaasi, sianeersooqaasi”.