Myanmarimi illuatungiliuttup aneqqusaannginnera sivitsorpaat
Myanmarimi naalagaaffiup atorfilittai arfineq-marluusut illu Aung San Suu Kyisip ukiuni 18-ini illumit aneqqusaanngiffia, ukiumik ataatsimik sivitsuisoqarnissaanik kalerriiartorfigaat.
USA-mi præsidenti Georg W. Bush taama aalangertoqarnera pillugu tutsiuppoq 62-inik ukiullip taassuma illuatungiuliuttuusup aammalu nobelip nersornaasiuttagaanik nersornaaserneqarnikuusimasup mattusimaneqarnerata ukiumik ataatsimik sivitsuiffigineqarnissaanik sakkutuut naalakkersuisuisa aalajangernerat assut ajuusaarnartuutillugulu ernumanartoqartikkini.
Georg W Buship tamatumunnga atatillugu sakkutuut naalakkersuisuinut kajumissaarutigaa Myanmarimi politikkimik tunngaveqarlutik parnaarusimaneqartut aniguisittariaqaraat, taamalu paaseqatigiinnikkut arnaq taanna Aung San Suu Kyi allallu nunaminni tamat oqartussaaqataanissaanik sorsuuteqartut paaseqatiginiartariaqaraat.
Taamatuttaaq EU-p Myanmari pillugu aallartitaa Italiamiu Piero Fassino isumaqarpoq politikkikkut illuatungiuliuttup taassuma illumit aneqqusaannginnerata sivitsorneqarnera akuersaarneqarsinnaanngitsoq. Taanna ilaatigut oqaasertaliivoq taama iliorneq tulluanngitsumik iliuuseqarnerusoq. Taannattaaq erseqqissaavoq Myanmarip parnaarussinermik inatsisaa unioqqutinneqartoq, tassamigooq ukiut tallimanik illumit aneqqusinnginneq sinnerlugu aaqqiisoqaqqusaanngimmat.
Taamatuttaaq FN´p generalsekræteriata Ban Ki-moonip taama aalajangertoqarsimanera ajuusaarnartuutippaa.
