Myanmarimi ajunaartorpassuupput sumiiffeerunneqartullu aamma amerlaqaat

Anorersuaq nalunaaquttap akunneranut 190 kilometerisut sakkortutigisoq sunik tamanik teqqaatitsimmat inuit milliuunillit angerlarsimaffeerussimanissaat naatsorsuutigineqarpoq. Ukiullu taamaalinerani siallerujussuartalertarmat aarlerineq minnerulinngilaq.

Burmamiut sakkutuunik isornartorsiuillutik oqalupput mattuttut akerliussutsimik siorna takutitseqattaarmata sukkanerusumilluunniit qanoq iliuuseqarniarsimasut.

Taamanimi eqqissisimasumik akerliussutsimik takutitseqattaarnerit sakkutuunit ingerlaannaq sakkortuumik akiorneqarput.

Aarhusip universitetiani Inuiaat qanoq inuusimanerannik immikkuullarissusaallu pillugit ilisimatusarnermi ilinniartitsisoq, Michael Gravers, oqarpoq, ajunaarnersuaqarneranut piareersarsimannginneq naalakkersuisullu avataaniit ikiuiniartunik nakkutilliiniarnerat sakkutuut pimaarnerujussuannut pissutaasut. Naalakkersuisut ikiuutiginiakkat tapersersortiminnit agguaanneqarnissaat anguniarpaat, inuit isumaqarniassammata naalakkersuisunit ikiuutit pisut.

Soorunamiluaasiit naalakkersuisut tapersersortitik siulliullugit ikiorniarsaraat.