Myanmarimi 30.000-it maqaasineqarput

Myanmarimi aamma Burmamik taaneqartartumi sapaatip akunnerata naanerani ulussaarsuup kiattup anorersuata pitoraatereerneratigut inuit 30.000-it maqaasineqarput.
Allattoq Louise M. Kleemann
maajip 06-at 2008 08:23

Maqaasineqartut saniatigut ajunaartut 15.000-iunerarneqarput, taamaatut oqarpoq Thailand-imi nunanut allanut naalakkersuisoq Noppadol Pattama, Myanmarip Bangkokimi aallartitaanik oqaloqateqarnermi kingornagut.

Myanamarip Thailandimi aallartitaa taanna tusagassiortunik oqaloqateqarusussimanngilaq.

Myanmar-imi sakkutuut kisermaassillutik aqutsisut illuatungiliuttuisa nuimanerit ilaat marlunngormat oqarpoq, kiattup anorersuata kingorna annattut ikiorneqartariaqalersut.

Myanmarimi innuttaasut nerisassaqanngillat illuatungiliuttunit Sein Win oqarpoq.

Naalagaaffiit Peqatigiit siuttuat Ban Ki-Moon neriorsuivoq Myanmarimi innutaasut annikilliortut ikiorniarlugit nunarsuamioqataasut piaartumik ikiuukkumaartut.

Myanmarimi sakkutuut kisermaassillutik naalakkersuisut nunap aqunneqarnerata allannguutissaannik innutaasunik taasisitsiniarnerat kinguaattoorfiuvoq, kiattup anorersuata eqquinerata kingornagut.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq