Muuamaat pillugu qisuariaatit

Aviisip ullumi saqqummersup Sermitsiap pruffiiti Muuamaamik titartakkanik ilanngussaqarnera pillugu, Naalakkersuisut siulittaasuat, Hans Enoksen, tusagassiuteqarneq pillugu aamma Naalakkersuisuusoq, akuliukkusunngilaq -

oqallinnermut tassa peqataarusunnani.

Muuamaamik titartakkat pingasut Sermitsiap ilanngukkaluarai Hans Enoksen tassa tunuarsimaarpoq.

Inatsisartut siulittaasuat, Naalakkersuisunullu siulittaasuusimasoq, Jonathan Motzfeldt, titartakkat pillugit ippassaq isummersuuteqarpoq.

- Muuamaamik upperisallit, musliimit, upperisartik pillugu quiassuaatiginninnerit tupinnanngitsumik ajuallaatigaat, Jonathan Motzfeldt oqarpoq.

Aviisip Sermitsiap titartakkanik ilanngussinera Kalaallit Nunaanni imatorsuaq qisuariaatigineqarnissaa aviisip aaqqissuisuunerata, Poul Krarupip, ilimaginngilaa, musliimit Kalaallit Nunaanni najugallit ikittuinnaammata.

- Ilisimasakka malillugit musliimi ataasiinnaq Kalaallit Nunaanni najugaqarpoq. Taanna tassaavoq Ilulissan aalisakkanik suliffissuarmi pisortaq, taanna Kangiani Qiterlermeersuuvoq. Ilimaginngilara taanna imatorsuaq qisuariaateqassasoq, nutaarsiasasqartitsivimmut Travel People-mut Poul Krarup oqarpoq.

Titartakkat pingasut nunatsinni aviisimi ilanngunneqarnerisa Kalaallit Nunaannut takornarnianut sunniuteqarnissaa Poul Krarupip aamma ilimaginngilaa.

Kalaallit Nunaannukartartut amerlanersaat, tassa 95 procentii Danmarkimeersuusarput, imaluunniit nunanit europameersuusarput, takornarniallu tamakku soqutigissagunanngilaat pruffiiti Muuamaat pillugu titartakkat Kalaallit Nunaanni aamma takutinneqarnerat, Poul Krarup oqarpoq.