Muuamaasiortut taarsiiffigiteqqupput

Danmarkimi muuamaamik upperisaqaqatigiit assigiinngitsut 27-t Jyllands Postemi aaqqissuisuuneq Carsten Juste, Jyllands Postemilu kulturi pillugu allaaserisanik aaqqissuisartoq Flemming Rose eqqartuussivimmut tunniuppaat.

Titartakkat allakkiallu nikanarsaataasut ajuallassutaasinnasullu ilisimaqqissaaraluarlugit saqqummersitsisimanertik peqqutigalugu pineqaatissinneqarnissaat muuamaamik upperisaqaqatigiinnit piumasaqaatigineqarpoq.

Muuamaamik titartakkat Jyllands Postemit saqqummersinneqarsimaneri tunngavigalugit Jyllands Poste eqqartuussivilersuunneqarsinnaanngitsoq qanittumi Rigsadvokatip aalajangiiffigereeraa inuit ataasiakkaat eqqartuussivimmut tunniunneqarput.

Profeti Muuamaat sorsukkumatuutut pinerlunniartartutullu titartarneqarsimagami sorsunnernut peqqarniisaarniarnernullu attuumassuteqartinneqartoq qiviaannarlugu takuneqarsinnaammat eqqartuussivimmut tunniussisoqarpoq.

Tunniussinermiit suliap aalajangiiffigineqarnissaanut ukiup ataatsip missaani utaqqinissaq ilimagineqarpoq.

Jyllands Posten pisuutitaassaguni akiliisinneqartussanngortinneqarsinnaavoq sivisunerpaamilluunniit ukiuni marlunni paarnaarussassanngortitsisoqarsinnaalluni.

Muuamaamik upperisaqaqatigiit aviisimi aaqqissuisut taakku marluk immikkut 50.000 koruuninik taarsiinissaat piumasaraattaaq.