Muuamaamut tunngatillugu ajornartorsiutip pileriartulersinnaanera mianersoqqussutigaat
Ilagiit qanganitsanik pingaartitsilluinnartut Dove World Out Reach Centre taakkuupput islamit atuagaataasa illernarnersaannik ikuallaaniartut. Tamanna septembarip aqqarnanni pissaaq imaluunniit palasip Wayne Zappip oqarneratut
"ulloq nunani tamalaani koranip ikuallanneqarfia" nunat muslimiusut tusagassiorfiini kamannermik pilersitsivoq.
Kangiani Qiterlermi tv-qarfimmut CNN-ip unammillertaanut Al Arabiamut islamimik ilisimatusartoq Dea Raswan oqarpoq:
Qallunaat titartagaat eqqarsaatigeriarsigik, takorlooriarsiuk korani ikuallakkussiuk qanoq pisoqassanersoq.
Ilagiit amerlanngitsuit taakkua namminneq oqarput islamimik upperisaqarneq kristumiussutsimut akerliusoq septembarillu aqqarnanni pisumut pisuusoq.
- Kristumiutut imminut taagoruit taamaaliortariaqarputit koranilu ikuallallugu, palasi Zapp oqarpoq.
Koranimik ikuallaanissaq suliniaqatigiiffiit arlaqartut isornartorsiorpaat, ilagiilli aammattaaq anguteqatiminnik arnaqatiminnillu atoqateqartartunik saassutarinnittartut isornartorsiorneqarnissartik tunniutiinnarfigineq ajorpaat.
Nittartakkami YouTubemi palasi Wayne Zapp aamma nangilluni akissuteqarpoq korani assiliissut ingerlatillugu ikuallanniarlugu, taassuma oqarneratut: ullormut uunnassaatiginiarlugu.
Amerikami avannarlermi muslimit ingasattajaarniat suliniaqatigiiffiata aamma ilagiit taakkua politiinut nalunaarutigai, isumaqaramik koranimik ikuallaanissaq pinerluttuliornerusoq kamannermik tunngavilik.
