Muuamaamik titartakkat ukiunik tallimannngortorsiorput

Ilinniusiortartup imminut killilersortalersimaneq peqqissimissutigaa.

Ilinniummi 'Islam Debat'-imi, tassa Islam pillugu oqallisissiani, 2008-mi saqqummersumi muuamaat pillugu najummassimanartorsiorneq ilaatinneqarpoq.Titartakkalli eqqissiviilliortitsilersut ilaanngimmata ilinniarnertuunngorniat taakku arajutsivaat.

- Taakkua ilanngunneqanngillat. Imminut killilersortariaqarneq pillugu ilaatinneqanngitsut ilinniusiortoq Allan Poulsen aviisimut Kristlig Dagblad-emut ullumi oqarpoq.

Allan Poulsen ullumikkut peqqissimavoq, ilaatinneqartussaasimagaluarpummi. Upperisarsiorneq pillugu ilinniarnertuunngorniarfinni HF-inilu ilinniartitsisut peqatigiiffianni siulittaasoq, Marie Louise Egbert Lauritzen, isumaqataavoq.

- Titartakkat ilaasa allaanerulaarnerat takutissallugu isummernissamut iluaqutaassagaluarpoq ilaatinneqarsimanngimmatalu uggornarluni.

Marie Louise Egbert Lauritzenip titartakkat atuartitsinermini iluaqutaalluartumik atortarsimavai.

- Sooq taamarsuaq pikitsitsilersimanersut muslimiunngitsut paasissagaluarpaat muslimillu pisup immikkuualuttortai ilanngullugit paasisimassagaluarlugit aammalu atuaqatitillu eqqartorlugit.

Ilinniarnertuunngorniarfinni ilinniartitsisut siulittaasuat isumaqarpoq nuuamaat pillugu titartakkat upperisamik ilinniartitsinermi ilaatinneqartariaqaraluartut.

- Upperisarsiorneq ulluinnarni inuunitsinnut ilaasorujussuuvoq taamaammallu upperisami isornarsinnaasut ilikkagaqarfigissallugit pisariaqarluni.

Ilinniartitsisut siulittaasuat isumaqarpoq titartakkat atuakkap tulliani naqinneqarnissaani ilaatinneqartariaqartut.

- Ilinniusiortoq asuliinnaq ajorsitsaarissanngilaq aammali allamik upperisalinnut inuiaqatigiinnilu ikinnerussuteqartunut iluareqqusaarluni imminut killilersorniassanani, Ilinniarnertuunngorniarfinni ilinniartitsisut siulittaasuat oqarpoq.