Muuamaamik titartakkat pillugit Europami akerliussutsiminnik takutitsisut

Muuamaamik titartakkat pillugit Europami ullumi sumiiffinni arlalinni akerliussutsimik takutitsisoqarpoq. Parisimi inuit 300-t missaanniittut allagartarsualisarlutik eqqissisimasumik ingerlaaqatigiipput.

-Eqqissisimasumik unioqqutitsinatalu ingerlaaqatigiippugut takutikkusukkatsigu titartakkanik saqqummersitsineq misigissutsitigut assorsuaq annersinneqaatigalugu, Frankrigimi musliimimik upperisallit kattuffissuanni oqaaseqartartoq oqarpoq.

Londonimi musliimit 4.000-it Trafalgar Square-mi katersuupput. Düsseldorfimi 800-t akerliussutsiminnik takutitsipput – Berlinimilu 500-t danskit aallartitaqarfiannut ingerlaaqatigiillutik. Taakku piumasarivaat Danmarkiminngaannit pisortatigoortumik utoqqatsertoqarnissaa. Tysklandimi akerliussutsiminnik takutitsinerit marluk eqqissisimasumik ingerlanneqarput.

Kangianili Qiterlermi akerliussutsimik takutitsinerit eqqissisimannginnerusimapput. Danmarkimi nunanut allanut ministeriaqarfiup Indonesiami Iran-imilu aallartitaqarfitik matuaat, sulisut sakkortuumik sioraasaarneqarnersa kingorna.

Syria Libanonilu massakkut aamma aallartitaqanngikkallarput.