Muuamaamik titartakkat Canadamut anngupput
Muuamaamik titartakkat maanna Canadamut anngupput.
Talerperliuniat politikkikkut atuagassiaata Western Standard-ip muuamaamik titartakkat arfineq pingasut ippassaq naqitertippaat.
Aaqqissuisuunerup Ezra Levant-ip titartakkat nammineq isumaa naapertorlugu ajoqutaanngivissut naqippai killiligaanngitsumik oqaaseqarsinnaanneq tapersersorniarlugu, amerikamilu avannarlerni tusagassiutini titartakkanik samminnikkusunnginneq peqqutigalugu. Levantip isumaa naapertorlugu, tusagassiutit qunullutik titartakkat sammerusunngilaat.
Ilanngullugulu oqaatigaa naqitat kristumiunut juutinulluunniit narrujuummisitsisinnaasut allaaserisinnaasaraat, taakku allagaqarlutik taamaallaat naammagittaalliortarmata.
-Kristumiut juutillu aallartitaqarfiit qaartartumeeriffigineq ajorpaat, tusagassiortullu niaquissanagit, Levant TV-qarfimmut CBC-mut oqarpoq.
Canadami Islamit ataatsimiititaliarsuaanni siuttuusoq Mohamed Elmasry avisimut The Globe-mut oqarpoq, atuagassiaq eqqartuussisulersuunniarlugu Canadami atuagassianik nikassaanermik siammartereqqusaannginnermik inatsit unioqqutimmagu.
