Muuamaamik titartakkat aviisip Sermitsiap saqqummiutissagunarpai
Pruffiiti Muuamaat quiassuaatigalugu titartakkat tusaamanerlugaaqisut pillugit Kalaallit Nunaat maanna akuliutitinneqalerunarpoq.
Aviisi sapaatip akunneranut saqqummersartoq, Sermitsiaq, periarfissarsissaguni, aqagu saqqummersussaq, saqqummeruni titartakkat taakku ilanngunniarpai.
Taama oqarpoq Sermitsiami aaqqissuisuuneq Poul Krarup.
- Periarfissarsissagutta Muuamaamik titartakkat ilanngunniarpavut. Massakkorpiaq teknikkikkut ajornartorsiuteqaratta erseqqissumik oqaatigisinnaanngikkallarparput, aaqqissuisuuneq oqarpoq.
Aviisinut manna tikillugu titartakkanik saqqummiussisimasunut Sermitsiap akuunialerunarneranut pissutaavoq, eqqissiviilliornerujussuarnut, akerartuunnernut assortuunnernullu atatillugu titartakkat qanoq ittuuneri inuiaqatigiit kalaallit aamma paasiniassammatigik.
Aviisip aappaani, AG-mi, aaqqissuisoq Laila Ramlau Hansen, oqarpoq, Muuamaat pillugu titartakkat AG-mut ilanngunnianngikkitik.
