Muuamaamik titartakkat aamma USA-mi
Pruffiiti Muuamaat pillugu titartakkat assortuussutaaqisut aqqaneq-marluk, Danmarkimi aviisimi Jyllands-Postenimi, siorna septembarimi ilanngunneqaqqaartut, USA-mi aviisersuit ilaata, Harpers Magazine-mi naqeqqinneqarsimapput.
Amerikamiut quiasaarutinik allattarlutillu quianarsisillugit titartaasartut nuimanersaasa ilaat pikkoreqisoq, Art Spiegelman, Muuamaamik titartakkat pillugit oqaaseqarsimasoq, nutaarsiassaqartitsivik Ritzau allappoq.
Muuamaamik titartakkat pillugit mamiatsannerujussuaq, titartakkallu amerikamiut aviisiitigut amerlanernit saqqummiukkusunneqarsimannginnerat, ”peqqusersiornermik ernumanermillu” ersersitsinerujussuaq pissutigalugu tusagassiuutitigut sammineqarsimannginnerat Spiegelmanip isornartorsiorpaa.
Jyllands-Posten isornartorsiuinermi aamma mininneqanngilaq. – Nunasisunut aviisi akeqqersimaarpallaaqaaq, Spiegelman oqarpoq, isumaqarnerarlunilu, killiligaanani oqaaseqarsinnaaneq utoqqatsissusiullugu pruffiiti Muuamaamik titartaasussanik pissarsiorsimaneq unneqqaserlunnerusoq.
