Muuamaamik titartagaq Sverigemi aviisini ilanngunneqarpoq
Muuamaamik ilaarutiginnilluni titartagaq Sverigimi aviisinit arlalinnit ullumikkut ilanngunneqaqqippoq. Titartagaq taanna pissutigalugu titartaasoq, svenskiusoq, Lars Vilks, toqumik sioorasaarneqartarpoq.
marsip 10-at 2010 07:25
Lars Vilks peqatigiinniapilunnit toqunniarneqarsimasoq ippassaq paasineqarpoq. Taamaakkaluartoq Sverigimili aviisit arlallit, soorlu Expressen, Dagens Nyheter aamma Sydsvenskan ullumi saqqummersut titartagaq ilanngussimavaat. Danmarkimi tusagassiorfiit arlallit ullumikkut taama tusarliussaqarput.
Titartakkami pruffiiti Muuamaat qimmip timaanik timilerneqarsimavoq.
- Aviisiliortorpalaartumik naliliineruvoq. Qinngasaarinerunngilaq, paasissutissiineq'una, aviisimi Sydsvenskanimi aaqqissuisuuneq, Daniel Sandström, aviisimit Politikenimit issuarneqarpoq.
Peqatigiinniapiluit arfineq-marluk Lars Vilksimut perullululiorniarlutik pilersaarusiortutut ippassaq tigusarineqarput, arnaq amerikamiu titartaasumut pinerleeriartutut aamma parnaarussaaqqavoq.
