Muuamaamik titartaasoq suliunnaarpoq
Titartaasartoq Kurt Westergaard qallunaat aviisianni Jyllands-Postenimi titartaasartuujunnaarpoq. Kurt Westergaard nunarsuup annersaani ilisimaneqalerpoq ukiut tallimat missaanni matuma siornagut profeti Muuamaat nasartaataasamini qaartartuutilerlugu titartaramiuk.
juunip 07-at 2010 15:03
Toqutaanissaa tamatuma kingornagut arlaleriarluni pilersaarutigineqartarpoq -kingullermik ukiutoqqami, angerlarsimaffiani angutip ulimaammik toqoriaraluarmagu. Tassalu maanna aviisini titartaasartuujunnaarpoq.
- Qaammatip tulliani 75-iliisussaavunga, tamannalu pissusissamisoorsoraara 22-nik ukioqarlungali aviisimi sulilerama, Kurt Westergaard, sulinerminit ukiarmili feeriaqalersimasoq oqarpoq.
Neriuutigaa suliunnaarnermigut Morgenavisen Jyllands-Postenimut sioorasaarutit ikinnerulissasut, paarsisinili iperarumaarnerlugit neriuutiginagu.
- Aap, taama isumaqarpunga, kisianni PET-ilu pitsaasumik suleqatigiippugut, tamannalu ajornartorsiutaanani, Kurt Westergaard naggasiivoq.
