Muuamaamik ilaarutiginnilluni titartakkat naqiteqqinneqartut

Muuamaamik ilaarutiginnilluni titartaasartup Kurt Westergaardip titartagaa oqallisaaqisoq Belgiami, Tjekkiami, Slovakiami, Portugalimi Surinamimilu naqeqqinneqarpoq. Titartaasartup tallimanngormat saassunneqariaraluarnera pillugu allaaserisat 600-nit amerlanerusut nunarsuaq tamakkerlugu allaaserineqarsimasut nittartakkami Outside24.dk-mi atuarneqarsinnaavoq.
januaarip 05-at 2010 14:03

Muuamaamik titartagaq aviisit ikinnerpaamik arfinillit atoqqippaat, aviisillu titartakkamik atoqqiisut ilaat aviisiupput ullormut saqqummersartut annerit.

Titartakkap siusinnerusukkut saqqummerseqqinneqarnera nunarsuaq tamakkerlugu musliminit kamaatigineqaqaaq, Outside24.dk-mi allaaserinnipput.

Kurt Westergaardimut saassusseriaraluarneq aviisinit nunarsuarmeersunit angisuunit allaaserineqarpoq, soorlu Indiami aviisersuup The Hindup saqqaaniilluni.

Nittartakkami Outside24.dk-mi allaaserisani aamma atuarneqarsinnaavoq, De Forenede Arabiske Emiratini aviisimi Gulf Newsimi pingaarnertut allaaserisami allassimasoq, muslimit profetiat Kurt Westergaardip sakkortuumik ajuallatsissimagaa, Kurt Westergaardili puiguinnaraanni pitsaanerusoq.

Italiamiut aviisianni ilaatigut allaaserineqarpoq, muslimit toqutsinissamik siorasaarisartillugit sooq ataqqineqassanersut, Pukkitsormiut aviisianni allaaserineqarpoq, Kurt Westergaard tusaamasaallunilu danskit pisortat ataqqineqarlutillu tapersersorneqartariaqartut.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq