Naalakkersuisut siulittaasuata tullersortaata Múte B. Egedep (IA) Nunatta, Danmarkip USA-llu akornanni Washingtonimi oqaluttuarisaanermut pingaaruteqartumik ataatsimiinnerat pingasunngornermi unnukkut oqaasertalerpaa.

- Inuiaqatigiit ikittunnguuvugut, tatineqarnitsinnilu immitsinnut isumassorluarnissarput pingaaruteqarluinnarpoq, Múte B. Egede oqarpoq.

Oqariartuut tamanna Naalakkersuisut siulittaasuat, Jens-Frederik Nielsen (D) marlunngornermi apersorneqarnermini aamma oqaatigaa.

Tamatuma saniatigut naalagaaffiup nunanut allanut attaveqarneri ingerlateqqissagaat, Múte B. Egede oqarpoq.

- Nunat Natomi ilaasortaasut aamma oqaloqatigerusuppagut. Upalungaarsimanermik aamma annerusumik suliaqartariaqarpugut, partiinilu ilaasortat suleqatigalugit. Inatsisartut periarfissaq siulleq atorlugu tamakku oqaloqatigiissutigissavagut, taanna oqartoq Sermitsiaq allappoq.

Sakkutuut sungiusarneri

Múte B. Egedep nunatsinni sakkutuut najuunnerulernerat aamma oqaaseqarfigaa. Nunaniillu arlalinnit sakkutuunik nunatsinnut pingasunngornermi aallartitsisoqareerpoq.

- Nunatsinni sakkutuut umiarsuinik amerlasuunik takusarnissarput naatsorsuutigissavarput. Sakkutooqarnikkut sungiusarnerit ingerlanneqassammata. Taakku sungiusarnermut tunngasuusut, allanullu tunngassuteqannginnerat erseqqissaatigerusupparput, Múte B. Egede oqarpoq.

Naalakkersuisut siulittaasuata tullersortaa namminiilivinnissamut oqallinnermut tunngasumik aamma aperineqarpoq. Jens-Frederik Nielsenip oqarnera naapertorlugu taakku pillugit oqaloqatigiinnissamut maannakkut piffissaanngilaq. Taassuma tamanna KNR-imit aamma Sermitsiamit apersorneqarnermini oqaatigaa.

Múte B. Egedep (IA) tusagassiortunit apeqqut tassa siunissami namminiilivinnissamut qanoq oqaluuserinnitsigissanersugut marloriarluni avaqqutaaralugu akissuteqarfigaa.

- Periarfissarsiorlutalu periarfissanik misissuissaagut, kisianni pitsaasumik oqaloqatigiissaagut, taanna akivoq.

Qaffasissumik atorfilittat suliaqartuusut

Nunanut allanut naalakkersuisut Vivian Motzfeldtip (S), Danmarkimit Lars Løkke Rasmussenip, USA-mit Marco Rubiop aamma Amerikamiut præsidentiata tullersortaata, J.D. Vancep akornanni ataatsimiittoqarmat nunarsuarmit tamarmit tusagassiorfiit Washingtonimut malinnaapput.

Ataatsimiinnermi Amerikamiut præsidentiata Donald Trumpip Nunatsinnik tiguserusunnera unitsinneqanngilaq. Tassanilu isumaqatigiinngissuteqarlutik isumaqatigiittoqartoq, nunanut allanut ministerip, Lars Løkke Rasmussenip tusagassiortunik kingorna katersortitsinermi oqaatigaa.

Naallu isumaqatigiinngitsoqaraluartoq suleqatigiissitaq qaffasissumik atorfilinnik inuttalerneqartoq nunap killeqarfiinik imaluunniit Kalaallit Nunaata nammineq aalajangiisinnaassuseqarneranik innarliinngikkaluarluni USA-p sillimaniarnermut tunngatillugu kissaataanik eqquutsitsisoqarsinnaaneranik misissuisussaq pilersippaat.