Múte B. Egede Nuummi nalunaaqutaq 14 tusagassiortunik katersortitsissaaq
Naalakkersuisut siulittaasuat, Múte B. Egede (IA) sapaatip akunnerani ulapingaatsiareerluni Danmarkimit uteriartorpoq, taannalu naalakkersuisuni nalunaaqutaq marlunut tusagassiortunut katersortitsiniarpoq.
Tusagassiortunik katersortitsinermi qulequtarineqarpoq: Ateqaannarlunilu ”ulluni makkunani pisut”.
”Ulluni makkunani pisut” suut pineqarnersut tusagassiuutinut nalunaarummi allassimanngilaq. Pisoqangaatsiarporli. Trump Junior Nuummut sapaatip akunnerata missaata matuma siorna tikeraarpoq, teqqianillu MAGA-mik allanneqartunik agguaassillunilu inoqutinut attaveqaatimi imassaanik suliaqarpoq, Trump Seniorilu Floridami tusagassiortunik katersortitsivoq, taassumalu Kalaallit Nunaannik aqutsilernissaminut sakkutuunik aningaasaqarnikkulluunniit pillaatimik atuisinnaanissamut periarfissaqarnera oqaatigaa.
Angajoqqaanik misissuinermut suliamut "aaqqiissut"
Præsidentinngortussamulli tullersortaasussap, J.D. Vancep "sakkutuulersornermik atuinissaq pisariaqanngitsoq" kingusinnerusukkut oqaatigaa.
Múte B. Egedep Trumpip oqaaseqaatigisai ernumanartutut oqaatigai. Taassumali8 nunarput tuniniagaanngitsoq aamma kalaallit nunatta siunissaanik aalajangiisussaasut erseqqissaatigaa.
Danskit naalakkersuisui aamma nunatsinni naalakkersuisut meeqqanut inissiisarnermut suliani tarnikkut misissuissutit oqallisaangaatsiartut pillugit ataatsimut aaqqiissutissamik isumaqatigiissuteqarsimasut danskit Isumaginninnermut Ineqarnermullu ministereqarfiata ippassaq nalunaarutigaa.
Misissuutit kalaallit kulturiannut oqaasiinullu naleqqussagaanngitsutut isornartorsiorneqarsimapput. Isornartorsiuisut taakku kukkusumik inissiisoqarneranik kinguneqarsinnaasoraat.
Ataatsimullu aaqqiissutit imarisai ministereqarfiup itinerusumik oqaatiginngilaa. Tamannali sapaatip akunnerani matumani saqqummiunneqarumaartoq oqaatigineqarluni.
Kiisalu Inatsisartunut qinersisoqangajalerpoq - tassa kingusinnerpaamik apriilip ulluisa arfernani.
Kommunimut apriilip ulluisa aallaqqaataani qinersisoqassaaq, ilisimavarsilu kingullermik 2021-mi qinersisoqarmat ullormi ataatsimut taakkununnga marlunnut qinersisoqarpoq.
KNR-ip tusagassiortunut katersortitsineq KNR1-ikkut aamma knr.gl-ikkut toqqaannartumik aallakaatissavaa.
