Musliimiuneragaq musliimiunngilaq

Aviisip Sermitsiap aaqqissuisuunerata Poul Krarup-ip peqqissimissutiginngilaa Muuamaat quiassuaatigalugu titartakkat Sermitsiami saqqummiunneqarnerat.

Nutaarsiassaqartitsiviulli Travel People-p issuaasimanera ajuusaarutigaa, taakku issuaapput, Sermitsiaq titartakkanik saqqummiussisariaqarsimasoq nunatsinni musliimeqarpiannginnera pissutigalugu.

- Tamatumunngami tamanna attuumassuteqanngilluinnarpoq, oqaloqatigeerujoornitsinni aperineqarpunga, Kalaallit Nunaanni qassinik musliimeqarnersoq. Aperisoq akivara, ataasiinnaq kisiat nalunagu, tassalu Ilulissani tunisassiorfiup pisortaa kisiat musliimiusoq nalunnginnerarpara. Taamatulli oqarama kukkusimavunga, tassami angut taanna musliimiunngilluinnarmat, Poul Krarup oqarpoq. Nangipporlu:

- Kisiannili tassa Sermitsiami tamanna pineqanngilluinnaraluarpoq, atuartartulliuku massakkut musliimit akornanni aalassassutaaqisut Muuamaat ilaarlugu titartakkat takusariaqarmatigik ilanngussisugut, Poul Krarup oqarpoq.