Musliimit suliniuteqalerput
Nunat muslimiusut ingasattajaartuunngitsut Malaysia aamma Indonesien Kangianut Qiterlermut islamimik sakkukinnerusumik siammarterillutik misiliinialerput, tassami Kangiani Qiterlermi islamimik malinninniaqqissaarneq nunanit taakkunannga marlunnit Asiamiittunit ingasannerusarmat.
Misiliineq suliniaqatigiiffimmit Den Islamiske Konference-mit nunanik muslimiusunik 57-inik ilaasortaqartumit ingerlanniarneqaarpoq.
Indonesiami, nunarsuarmi inuttunerpaasumi, muslimit peqqarniisaarniat ajornartorsiutaapput, kisianni innuttaasut amerlanersaat Malaysiamiusulli ingasattajaartuunngillat, nunallu taakkua marluk upperisarsiorneq malinnagu naalakkersorneqarput.
- Nunanut allanut ministerip aammattaaq tikkuarpaa, Malaysiami islamimut ingasattajaanngitsumik pissuseqarneq patsisaalluni, Muuamaat ilaarutigalugu titartakkat pissutigalugit Danmarkimut akerliuniarneq killilimmik eqqissisimasumillu ingerlanneqarsimasoq. Pisimasut maanna qaangiutereersutut isigineqarput, danskit nunanut allanut ministeriat, Per Stig Møller maanna Malaysiamiut nunanut allanut ministeriannut tikeraartoq oqarpoq.
Malaysiamiut tusagassiortut aamma oqaatigaat pisimasoq soqutigineerutereersoq, sulili eqqaamaneqartoq.
- Maanna pisimasoq oqaluttuarisaanermiilereerpoq, Danmarkilu ajortumik eqqarsaatiginngilarput. Kisianni taama pisoqaqqissappat sakkortunerusumik iliuuseqartoqassaaq, Malaysiamiut tv-qarfianni Kanal 9-mi aviisiliortoq oqarpoq.
