Musliimit marluk sorsunnermik iluartumik aallartitsinissamut allagartanik uppernarsaatinik peqarsimapput
Isumannaallisaanermut Kinami ministereqarfimmit ullumi ilisimatitsissutigineqarpoq, musliimit marluk, provinsimi Xinjiangimi politeeqarfimmik ippassaq saassussisut, politiinillu 16-inik toqutsisut, sorsunnermik iluartumik, tassa islami pillugu sorsunnermik, aallartitsinissamut kajumissaarummik allagartanik uppernarsaatinik peqarsimasut.
aggustip 05-at 2008 07:40
Kinami oqartussaasut arlaleriarlutik aarlerisaarutigereerpaat, OL-eqarnissaanut atatillugu saassussinissamik sakkortunerpaamik sioorasaarisut tassaasut Xinjiang-provinsimi musliimit immikkoorniat, uighurit.
Saassussinerulli immikkoorniallu imminnut attuumassuteqarnerat inuiaat nunagisaminnit qimarngusut ikinnerussuteqartut ippassaq ilumuunnginnerarpaat.
Immikkoorniat uighurit sakkortunerusumik pineqartalernissaat Kinap ingasattumik utoqqatsissutitut atoraa inuit pisinnaatitaaffiinik suliniaqatigiiffiit isumaqarput.
Xinjiang-provinsimi, musliiminit naalagaaffigineqarnerusumi, perulluliorsorisat nunani allaneersut 18-it tigusarineqarsimasut Kinami oqartussaasut pisortatigoortumik ungasinngitsukkut nalunaarutigaat.
