Musliimit immunnut akiniaaqattaapput

juunip 14-at 2007 05:33

Shiamusliimit qinusarfiat Samarramiittoq, ippassaq qaartartumeerneqareersorlu, sunnimusliimit qinusarfiinik akiniaalluni saassussinerit pipput.

USA-p Irakillu sakkutuui amerlasoorsuanngorlutik qinusarfiit eqqaanni nakkutiginnikkaluartut ikuallaanerit pipput.

Naak Shiamusliimit palasiini qullersaasut ilaat, Moqtada al-Sadr, akiniaasaqattaarnissamik pinaveersaartitseqqusigaluartoq, sunnimusliimit qinusarfii Irak-imi illoqarfimmi Mahaweel-imiittoq aammalu Iskandariyamiitoq ullaaq manna ikuallanneqarput.

Qinusarfinnik ikuallaanerit akiniaanertut nalilerneqarput, USA-milu præsidenti George W Bush oqarpoq, sunnimusliimit shiamusliimillu imminnut akiuukkunnaarlutik, Al-Qaeda-mut akiuunniartariaqartut. Aamma Irak-ip nunanut allanut ministeria Hoshiyar Zebari oqarpoq, USA-p sakkutuuisa Irakimiitinneqarnissaat suli pisariaqartinneqaqisoq:

- Irak-ip sakkutuui akersuunnernut taamaattunut akiuunnissamut naammanngillat, taamaammat USA-p Irak-imi sakkutuuliisimanera suli pisariaqaqaaq. Zebari oqarpoq.