Musliimit danskit erfalasuannik ikuallaqqipput

Ullumi tallimanngornermi nunarsuaq tamakkerlugu, muamaakkormiut qinunerini danskit erfalasui ikuallanneqarput. Palasiunerillu piumasaraat danskit nioqqutissiaannik piseqqusiunnaarneq sukannernerulertariaqartoq.

Nunani Persiap kangerliumarngata sineriaaniittuni danskit tunisassiaat pisiniarfinnit aqqaassorneqarput, sulilu inuit imminnut tinnersartuarput mobil-ikkut piseqqusiunnaarnerup suli annertusisariaqarneranik oqariartuuteqartumik.

Qatar-imi tallimanngornermi qinoqatigiinnerit ilaanni palasiunerit ilaata inassutigaa danskit tunisassiaasa pisiareqqusaajunnaarnerinut taarsiullugit Kinamit, Japanimit Malaysiamillu taartissaannik pisisinnaanertik piviusunngor-

tinneqassasoq - mitaatigineqassannginnamik.

Naak qinoqatigiinnerni arlalinni palasit eqqisseqatigiinnissamik paaseqatigiinnissamillu inatsigaluit, qinusarfiit silataanni akerliussutsiminnik takutitserrattorsuupput.

Irakimi, Tyrkiami, Libanonimi, Sudanimi Pakistan-imilu danskit erfalasui, tunisassiaallu ikuallanneqarput.

Palæstinami sualunnersaasimapput. Nillerrapput titartakkanik saqqummiussisut Danmarkilu qaartinneqassasut. Qinoqatigiissut ilaasa titartakkanik saqqummiussisut niaquigassaanerarpaat. Tyrkiami illoqarfimmi Istanbulimi danskit aallartitaqarfiat manninnik milloorneqarpoq.

Pakistanimi inatsisartut danskit perloqquaat, præsident-iatalu danskit iliornerat ajuusaarutigalugu.

Afghanistanimi, nunanilu ataasiakkaani naalakkersuit pisoq sakkortugaluaq, taamaattoq saammaateqatigiinnissaq pisariaqarnerarpaat.

København-imi muamaakkormiut tallimanngornermi qinunerat arajutsiniarneqanngilaq. Muamaamik titartakkat aqqaneq marluk palasiunerup Abu Labanip sajuppillatsitsisimanerarpai.

Nunat 76-it aallartitaat danskit ministeriunerata Anders Fogh Rasmussen-ip ullumi ataatsimeeqatiginerini pisoq nunarsuatsinnut tamarmut tuniluuteriaannaanerarpaa; erseqqissaatigaali danskit naalakkersuisuisa tusagassaqartitsiviit oqartussaaffiginngimmatigik utoqqatserniaratik.