Musliimit anersaartuutinut illersuuteqartut ikittuinnaat Mekkamiissinnaasut
Muslimit Hajjimik taallugu Saudi-Arabiami Mekkamut ilerfiartarnerat pingasunngormat aallartippoq, coronavirusilli ajornartoortiitsinera pissutaalluni ilerfiat pisarnermit ukioq manna ikinnerungaatsiarput.
Meterip aappaata qeqqa imminnut ungasitsigissapput. Qinnussisoqarnerup upperisarsiornermullu atatillugu ileqqutoqqat nalaanni tamanna atuuppoq, neriniartarfinnilu, muslimillu toqqini najugaqarfiusuni tamanna aamma atuulluni.
Muslimit inuunerminni minnerpaamik ataasiarlutik Hajjimik taallugu Mekkamut ilerfiartartussaapput, Hajjilu ullunik tallimanik sivisussuseqarpoq, nunarsuarmilu upperisarsiornermi katerinnerit pingaarnerit ilaanniilluni.
Inuilli taamaallaat 10.000-t ukioq manna peqataassapput. Mekkamut ilerfiat nalinginnaasumik 2,5 millionit missaanniittarput.
Muslimit Mekkap qiterpasissuani Kabamik taasagaat kaaviiaartarpaat, ilaatigullu attortarlugu. Coronavirusilli tuniluutilernissaa pinngitsoortinniarlugu Kaba ukioq manna attorneqaqqusaanngilaq.
Muslimit taamaallaat Saudi-Arabiameersut ukioq manna peqataaqqusaapput.
Saudi-Arabiami coronavirusimik tunillanneqarsimasut 270.000-t missaanniipput, Kangia Qiterlermi tunillatsissimasut akornanni amerlanerpaallutik.
Ukioq manna killilersuinerit Saudi-Arabiap oqaluttuarisaanerani nutaajunerusumi sukannernerpaapput.
Saudi-Arabia nunarsuaq tamakkerlugu tunillaassuuttoqarnerata nalaani uuliap akiisa apparnera pissutigalugu aningaasakilliorpoq.
/ritzau/AFP