Mumbai-imi peqqarniitsuliornersuaq qaangiuppoq
- Aallaqqaammut isumaqaraluarpunga qummoroortartoqartoq, qaartartumilli qaartoqarmat paasilerpara amiilaarnartumik saassussisoqartoq, tamanna sekundti ataasinnguarluunniit qularutiginngilara, Jesper Baarnack oqaluttuarpoq, nangillunilu:
- Taava silatitsinni sakkortoorujussuarmik eqqartoqalerpoq, igalaat tamarmik sequmipput, qaliallu ilaat nakkaalermata tuikkut eqqortippunga. Eqqarsapallappunga imminut illersorniarluta iluuseqapallattariaqartugut, natermullu imminut igipallappunga, taamaaleruttorlunga niviarsiaraq akiatunginni issiasimasoq uippallerluni nillialerpoq. Niviarsiaraq tigupallappara natermullu piseriarlugu illersorniarlugu qaavanut pivunga. Taava suleqatima ilaat, timmisartumi inuttat angutitatuaat, aamma uanga qaannut pivoq, tassalu pingasuulluta qaleriilluta natermiilerpugut, nerriviup ataani, sutorniartarfiullu iluanut eqqaassisut imaaginnavillutik. Takusaqarsinnaanngilanga, sunali tamaat tusaavara. Oqarsinnaavunga aallaaneqarnissara qularutiginngivikkakku. Niaqora toqqorniarsaraara, suleqatimali ilaata uanga qalleqqammanga eqqarsarpunga naakkut immaqa aallaaneqassasunga, taamaattoqassappallu immaqa annassinnaassallunga.
Jesper Baarnack Danmarkip Radioanut taama oqaluttuarpoq. Inuit ikinnerpaamik 195-it ullut unnuallu kingulliit pingasut toqutaapput, 290-illu ikiligaallutik.