Mugabep ataatsimiinnermut peqataanera tupaallaatigineqarpoq

Nerisassat akitsoriartornerujussuat pillugu ataatsimiinnermut peqataaniarnini Robert Mugabeb sapaatiummat nalunaarutigimmagu tamanit tupaallaatigineqarujussuarpoq. Mugabeli Romamut ippassarli tikereerpoq nunarsuatsinnilu pissaanillit akornanniissinnaatitaanissani piumasaralugulusooq, soorlu siorna EU-p Afrikamilu naalagaaffiit kattuffianneersut Lissabonimi ataatsimeeqatiginialermagit aamma taamaaliortoq.

Mugabep peqataanera mitassaanertut tulluartuunngilluinnartutut peqataasunit allanit isigineqarpoq.

- Mugabep naalakkersuisuusaarnerata nalaani Zimbabwe, siornatigut Afrikap peqqumaatissaqarfiatut isigineqartoq piitsorujussuanngorpoq, maannakkut inuit 4 milliuunit missaaniittut nunanit allanit ikiorneqarnissartik allaat pinngitsoorsinnaajunnaarlugu, Tuluit ineriartorneq pillugu naalakkersuisuat, Douglas Alexander oqarpoq.

Australiamilu nunanut allanut ministeri tapersiilluni oqarpoq, Mugabep iliuusai innuttami nerisassaaleqilernissaannut peqqutaanerpaasimasut.

Romamili atatsimiinneq Mugabemuinnaq tunngassuteqanngilluinnarpoq, ataatsimiinnerlu aallartimmat Mugabe tunuaamilluni malinnaavoq.

- Nunarsuatsinni nerisassaaleqinermut piaarnerpaamik sapiissuseqarlusi akiuiniarnissarsi tamassinnut kaammattuutigissavara, Naalagaaffiit Peqatigiit pisortaat, Ban Ki Moon ataatsimiinnermik ammaanermini ilaatigut oqarpoq, nangillunilu; ukiut kingulliit pingasut ingerlaneranni nerisassat marloriaammik akeqalersimapput, nunarsuatsinnilu nerisassiornerup piaarnerpaamik qaffassarnissaa pisariaqartinneqarpoq.