Muammar al-Ghadaffip iperagaatitsinera EU-miit toqqissisimanartinneqanngilaq

Nunarsuatsinni naalakkersuinermik suliallit inuillu pisinnaatitaaffiinik sorsuutiginnittut nuannaarutigeqisaannik Bulgariamiut peqqissaasut tallimat nakorsarlu Palæstinamiu Libya-mi ukiut arfineq pingasut parnaarusimaneqareerlutik ippassaq iperagaatinneqarput. Taamaattorli peqatigisaanik kisermaassilluni naalakkersuisoq Muammar al-Ghadaffi parnaarussaminik, aallaqqaammulli tigusaasimasariaqanngikkaluartunik, iperagaatitsinera pillugu EU-miit nersualaarneqarnera amerlaqisunit toqqissisimanartinneqanngilaq.

- Akuerineqarsinnaanngilluinnarpoq peqqissaasut tallimat nakorsarlu sallunaveeqqutitut tigummineqarmata 400 millioni dollarsinillu akiliilluni iperagaatinneqarmata.

Taama naliliipput nakorsat inuit pisinnaatitaaffiinik sorsuutiginnittut Bostonimi angerlarsimaffeqartut. Taamatut pissusilersortut akilerneqartariaqanngitsut suleqatigiit isumaqarput. Aamma taama isumaqarput inuit pisinnaatitaaffii pillugit suliniaqatigiit Human Rights Watch.

- Libyap nunarsuarmioqatigiinnut pissusilersornini pitsanngorsarniarmagu tapersersorparput, kisianni inuit pisinnaatitaaffii pilliutigineqartariaqanngillat, suliniaqatigiit oqarput.

Amnesty Internationalip nittartagaani Bulgariamiut iperagaanerat nuannaarutigineqarpoq, taamaattorli Amnesty-mit aammattaaq mianersoqqusisoqarpoq.

- Libyami oqartussaasut inatsisitigut iluarsaaqqinnerit nutaat pisariaqartinneqalivissut isumagisariaqarpaat, pisutut ittumik pisoqaqqinnginniassammat, nittartakkami allassimavoq.

Hanne Severinsen Europarådimut ilaasortaasoq oqarpoq taama pisoqaqqinnginnissaa neriuutigigini. Aammattaarli EU-p Libyap siuttuanik isumaqatigiissuteqarnissaa silatusaarnerussasoq isumaqarluni.

- Aap, oqaasii malersoqqinneqartariaqarput oqarfigalugulu Libya maanna allatut aqunneqartariaqalersoq, Hanne Severinsen oqarpoq.

Taama ingerlariaqqittoqarnissaa Ghadaffip malikkumassaneraa suli nalunarpoq. Aamma aviisip “International Herald Tribune”-p eqqaasitsissutigaa, peqqarniisaarniarneq atorunnaarlugu inuit pisinnaatitaaffii demokratiilu tunngavigalugit ingerlatsilernissamik, EU-p nunanut Afrikap avannaaniittunut isumaqatigiissutaa suli Libyamit atsiorneqarsimanngimmat.