MT Højgaard: Suliniutinut angisuunut peqataasinnaanissamut piareersimasariaqarpugut

Piareersarneq, piareersarneq aammalu suli piareersarneq. Suliniutinut angisuunut atatillugu peqataasinnaanissaq anguniaraanni, taava piareersimanissaq pingaaruteqarpoq.
Allattoq Mads Lynge
novembarip 13-at 2012 08:32

Nuup Kangerluani Isukasiani saviminissamik piialersinnaanissamut qinnuteqaat aatsitassarsioqatigiit London Mining utaqqivaat, Nunatsinnilu suliffeqarfiit assigiinngitsut Nuup Kangerluani sanaartornermut atatillugu peqataasinnaanissartik saniatigut aamma sulissutigivaat.

Sanaartugassanik suliassinneqartartut MT Højgaard taakkununnga ilaapput, piareersimanertillu immikkoortortami pisortap Joannes Niclassenip oqaatigaa:

- Suliassaq suli qulakkeerneqanngilaq. Suliassat allarluinnarmut tunniunneqaratarsinnaapput, allatulli piareersimasariaqarpugut. Ukiuni kingullerni arfineq-marlunni allanik suliaqarnikuunngilanga, tassa misissuinernik suliaqarlunga, qularinngilaralu arlaannik suliassaqalerumaarluta, piareersimasariaqarpugulli, MT Højgaardip immikkoortortami pisortaa Joannes Niclassen oqarpoq.

Taanna suliffeqarfiit allat peqatigalugit Aatsitassarsiornermut naalakkersuisoq Ove Karl Berthelsen peqatigalugu nittarsaassiartorlutik Kinameeqqammerpoq.
Nunat tamalaat aatsitassat pillugit saqqummersitsivissuanni China Mining & Expo 2012-imi peqataapput, sanaartugassanillu suliassinneqartartut nunarsuarmi annersaat ilaat CCCC, Kinameersoq, MT Højgaardip aamma oqaloqatigai.

Aatsitassalerinermut atatillugu sanaartugassanik suliakkinneqarnissamut periarfissinneqarniaraanni suleqatigiinnissaq pingaaruteqarluinnarpoq, Issittumili aatsitassarsiornermik CCCC misilittagaqanngimmat, MT Højgaard matumani pingaaruteqartutut inissisimalerpoq:

- CCCC sanaartornermik Nunarsuarmi misilittagaqarluarpoq, Issittumili sanaartornermik misilittagaqarani, uagulli misilittagaqarluarluta. Taamaammat suleqatiserinnipput, Joannes Niclassen oqarpoq.

Saviminissamik piaanissamut fabrikinik naammassineqareersunik tunisassiortartut SinoSteel Kinami sapaatip-akunnerata siuliani aamma ataatsimeeqatigineqarput, soorlu aamma suliffeqarfiit Nunatsinneersut makkua MT Højgaardip suleqatigigai:

Permagreen, EMJ Atcon, Godthåb Transportservice, Brøndum Grønland A/S, aqqartartut Masik MT Højgaardillu pigisaa Arssarnerit.

Taamatut suleqateqarnikkut suliniutinut angisuunut peqataasinnaalernissaq, Joannes Niclassenip neriuutigaa:

- London Miningip pilersaarutai piviusunngussappata suliarujussuussaaq, kisimiillutali uagut naammassisinnaanngilarput, suliffeqarfiilli ataatsimoorlutik inissinnermikkut suliassat nammassinnaassavaat, MT Højgaardip immikkoortortaata pisortaa Joannes Niclassen oqarpoq.

Inuit 600-t missaat Isukasiani saviminissamik piiavimmiit Nuup Kangerluani umiarsualivissap tungaanut aqqusinniornissamut sulisorineqarnissaat naatsorsuutigineqartoq, Joannes Niclassenip aamma oqaatigaa.

Matumanili aamma erseqqissaatigineqassaaq Isukasiani saviminissamik piiasinnaanissamut akuersissut suli tunniunneqarnikuunngimmat.