MSC-mut uppernarsaat siulleq kalaallit aalisartuisa pissarsiarilerpaat

Kalaallit raajartaat nungusaataanngitsumik aalisarnermi pisaasut naqissuserneqartussanngorpoq. Tamanna pissaaq kalaallit raajartaat piumaneqaqisumik MSC-mik nalunaaqutserneqartalerpata.
Allattoq Noah Mølgaard
novembarip 01-at 2012 08:06

MSC-mut uppernarsaat tassaavoq aalisarnerup nungukkiartuutaanngitsumik ingerlanneqarneranut uppernarsaat.

Uppernarsaat taanna ukiuni sisamani anguniarneqareersoq maanna kalaallit piumasaat malillugu inissilinnguatsiarpoq taamatullu akuersissummik pissarsiniarneq aalisarnermik inuussutissarsiuteqartut 5 millioner koruuninik aningaasartuutigisimavaat.

- Nalunaaqutsersuineq naammassippat taava raaja qaleruallit uutat uunneqanngitsullu Kalaallit Nunaata kitaaneersut MSC-p ilisarnaataanik tungujortumik nalunaaqutserlugit nittarsaanneqarsinnaalissapput tuniniarneqarsinnaalerlutillu. Nalunaaqutsersuineq sinerissamut qanittumi avataanilu aalisarnermut aammalu EU-p aalisariutaanut ataatsimut Kalaallit Nunaata kitaani aalisarsinnaanermut akuerisaasumut, atuuppoq, Sustainable Fisheries Greenland, SFG-mut naalisarneqartartoq nalunaarpoq.

Danmarkimi Europamilu niuertarfissuit siusinnerusukkut nalunaareerput aalisakkanit qalerualinnillu tunisassiat nungukkiartuutaanngitsumik pisat kisiisa tuniniartalissalulgit. Kalaallit aalisartortaat koruuninik millionilikkaanik annaasaqartussaagaluarput MSC-mut uppernarsaat pissarsiarineqarsimanngitsuuppat.

- Maana nalunaaqutsorsuisarnissap atuutilinngitsiarnerani, Naalakkersuisunut ilaasortaq Ane Hansen naalakkersuisoqarfialu matuma suliarineqarnerani annertuumik suliaqarsimanerannut SFG-p qutsavigissavai. Aamma taamatut qutsavigineqassaaq Pinngortitaleriffik, tassami ullumi taama annertutigisumik angusaqarnitsinnut aamma taakku peqataalluinarsimammata.

- Raajarniarnermut tunngatillugu nalunaaqutsersuisarnissamik suliniutigineqarnerup malitsigisaanik aamma qaleralinniarnermut tunngatillugu suliniuteqartoqarnissaa pissusissamisuussaaq. Suliassaq taanna SFG-mi siulersuisut piffissami qaninnermi oqaluuserissavaat, Sustainable Fisheries Greenland nalunaarpoq.

Inuussutissarsiortut namminneq MSC-mik uppernarsaatinik qinnuteqarput uppernarsaallu ukiuni tallimani atuuttarpoq.

MSC-mik uppernarsaammik pissarsinissamut pappiaqqat najoqqutarineqartut nittartakkami uani takuneqarsinnaapput:

http://www.msc.org/track-a-fishery/in-assessment/arctic-ocean/West-Greenland-Coldwater-Prawn