MSC-mut meqqi siusinnerpaamik novembarimi pissavaat

Kalaallit raajartaat nungusaataanngitsumik pisarineqartartut siusinnerpaamik novembarimi naqissuserneqarsinnaavoq. Taama pisoqassappat piffissaq kingullerpaaq atorlugu inissittoqassaaq, tassami Europami niuertarfissuit siunniummassuk aalisakkat MSC-mik meqqillit kisiisa 2012-imiit tuniniartalerniarlugit.

Suliniaqatigiiffik Sustainable Fisheries Greenland qinnuteqaammik 2010 naalersoq nassiussivoq kalaallit raajartaasa MSC-mik meqqeqalernissaat anguniarlugu. Qinnuteqaatilli akueritinniarnera utaqqinartussaavoq. Europamilu niuertarfissuit kalaallit raajartaasa pisiariumajunnaarnissaat piareersarfigilereerpaat.

- Siunnerfigineqarpoq Kalaallit Nunaata qinnuteqaataata 2011-p naanerani naammassineqarnissaa, MSCp Europami allaffeqarfiani Haag-imiittumi pisortaq, Camiel Derichs, KNR-imut oqarpoq.

Europami atuisartut pisiamik nungusaataanngitsumik tunisassiarineqarsimanissaat piumasariaqartuinnarpaat.

Tuluit niuertarfissuat Marks & Spencer, Royal Greenlandip pisisartuisa anginerit ilaat, nittartakkamini allappoq aalisakkat MSC-mik meqqillit kisiisa 2012-miit pisiarisalerniarlugit.

Taamatuttaaq allappoq Dansk Supermarked niuertarfinnik Føtex-mik, Nettomik Bilkamillu piginnittoq.

- 2012-miik aalisakkat nioqqutigisavut tamarmik uppernarsaateqassapput nungusaataanngitsumik pisarineqarsimasutut. Tassani pineqarput nutaat, qerisut, pujukkat, pinngortitami pisat kiisalu tukertitsivinneersut, taama allappoq Dansk Supermarked.

Raajanik immami nillertumi pisanik avammut nioqquteqarnermi Nunatta qaninnertut unammillertai Canada aamma Norge MSC meqqinik atuisinnaasutut akuerisaareerput.