Kalaallit aalisakkanik tunisassiaat MSC-mik ilisarnaateqalernissaat taamaalillutillu nungusaataanngitsumik pisarineqarsimasut uppernarsarneqarnissaat tamatsinnut iluaqutaassaaq. Sustainable Fisheries Greenlandimi siulittaasoq taama isumaqarpoq, isumaqarportaaq Siumut siulittaasuata Aleqa Hammond-ip MSC-mik ilisarnaasiisoqarnissamut suliniummut isorinninnera aalisartullu MSC-ip piumasaqaataanut naammassinninnissaminnut periarfissaqannginnerannik Siumup isumaqarnera ajoqutaasoq.
- Illuatungiliuttut siuttuata aalisakkat kalaallit tunisassiaasa MSC-mik uppernarsaasernissaasa pisariaqarnerannik apeqqusiilluni oqariartuuteqarnera assut uggornarpoq, Henrik Leth, GA-mi Sustainable Fisheries Greenlandimilu siulittaasoq taama allappoq.
Aalisakkanimmi pisisartunut nungusaataanngitsumik pinngortitamullu mianerinnittumik aalisarneq pingaaruteqaleraluttuinnarpoq. Pisisartullu pingaartitaat tunisassiortunit malinneqartariaqarput, pisisartummi pisiuartarnissaat tunisassiortut ingerlaannarsinnaanerannut pingaartuummat.
- Ersarissorujussuarmik oqaatigineqarsinnaavoq: Kalaallit Nunaat siunissami Europami pisisartunut pilersuerusukkuni, MSC-mik uppernarsaasiisariaqarpoq. MSC-p atulerneratigut, siunissaq ungasissoq isigalugu aalisartut inuiaqatigiillu aningaasaqarniarnikkut iluaqutigilissammassuk illersornissaa soqutigisaraarput, Sustainable Fisheries Greenland-imi siulittaasoq oqarpoq.
Henrik Leth-illu erseqqissarpaa MSC-mut piumasaqaatit nunatsinni aalisartunut piumasaqaatigineqartartunut maannalu naalakkersuisooqatigiit siunissamut atuutilersinniagannut amerlasuutigut assingusut. Pisisartunut atuisartunullu nungusaataanngitsumik aalisartoqarneranik uppernarsaanissaq ilisarnaasersuinerup pingaaruteqarneranut peqqutaavoq.
- Taamaammat nunani tamani nalinginnaasumik sinaakkutaasussatut akuersissutaareersut Kalaallit Nunaanni politikkikkut assortuussutaalernerat, nunani allani nittarsaanniarnitsinnut ajoqutaasussaavoq, Henrik Leth illuatungiliuttut MSC-mik isorinninnerat illuatungilerlugu taama allappoq.
Erseqqissarpaalu siunissaq qaninnerusoq kisimi isigalugu aalisagartassiissutit annertusineqartarneri nuannareqqusaarnermik ersiutaasoq Sustainable Fisheries Greenland isumaqartoq. Tamannalu aalisarpilunnermik pisisartuniillu isigineqapilunnermik kinguneqarsinnaavoq.
- Nuannarineqanngitsunik aalajangiisoqartariaqartarpoq, tamannalu pisariaqartillugu politikerit nuannarineqanngikkaluanik aalajangiisarnissartik akisussaaffigaat, Henrik Leth allappoq.