M/S Europa nunatsinnut apuuppoq

Takornariartaassuaq taanna imaannaanngitsuuvoq, tassami takornariaqarnermut atuagassiap Berlitz-ip, nunarsuatsinni umiarsuit takornariartaatit pitsaanersaattut, M/S Europa toqqaqqammermagu.

- M/S Europa-mi angalasut inaat akisunerpaaginnaapput. Takornariartaammik piginnittut tyskiusut, Nunarput nuannarisupilussuuaat, tamannalu qujanarpoq. Naatsorsuutigisinnaavarpummi M/S Europa ukiuni tulliuttuni maanga tikeqqittarumaartoq, Visit Greenlandimi siunnersuisuuneq, Malik Milfeldt oqarpoq nangillunilu:

- Umiarsuup nunaqarfiit illoqarfiillu sinerissatsinni amerlasuut ukioq manna tikissavai, tamannalu takornarialerisutut nuannaarutigiinnarsinnaavarput, Malik Milfeldt oqarpoq.

Takornariat Aappilattumut tikikkunik takusassaasa ilagissavaat kalattut qitinnerit, kingusinnerusukkullu nunaqarfiup erinarsoqatigiivi oqaluffimminni tusarnaartitsissallutik. Nanortalimmi takornariaqarnermut pisortaq, Niels Tækker nalunaarpoq.

- Nuannaarutigissagaluarparput umiarsuaq Nanortalimmut aamma tikittuuppat, taamaattorli Aappilattoq eqqaalu takornariagassaqqissuummata naammagiinnartariaqarparput, Niels Tækker oqarpoq.

Umiarsuup takornariartaatip, M/S Europa-p ilaasorai tyskit, østrigimiut schweiz-imiullu katillugit 400-it missaanniittut.

Umiarsuup sapaatuippat tulliani Islandimukannginnermini Nunatsinni illoqarfiit aqqusaagassai tassaapput Qaqortoq, Paamiut, Nuuk aamma Ilulissat.