Qulaarpaa Mr. Gay Pride: Nunatsinni nikeriarnerujussuaq pisimavoq

Filmi Eskimo Diva nunatsinni sumiiffinni assigiinngitsuni takutinneqarmat isiginnaariarluarneqarpoq. Filmimi pingaarnertut inuttaasoq, Nuka Bisgaard, filmip angallanneqarneranut peqataavoq, suiaqatinoortullu isigineqarnerat allanngorujussuarsimasoq malugisinnaanerarpaa.
Allattoq Walter Turnowsky
maajip 20-at 2015 12:19
Nutserisoq Simon Uldum -

Allaatigisalli matuma qulequtaa, immikkut ittumik, allanngorteqqaartariaqarparput. Filmimimi Eskimo Divami oqaluttuarineqartutut, Nuka Bisgaard imminut 'Mr'-itut isigiunnaarsimavoq, arnatullu maanna imminut isigilersimalluni.

Filmi Nuummi apriili qiteqquttoq takuteqqaarneqarpoq. Tamatumalu kingorna filmimik suliarinnittut pingaarnertullu inuttaasoq Nuka Bisgaard sinerissami angalallutik filmi illoqarfinni arlalinni takutippaat.

IIlloqarfiillu tikinneqartut amerlanersaanni isiginnaariat imaaginnavittarput. Qaqortumilu ippassaq takutinneqarpoq.

-  Pikkunaqaaq, taamami amerlatigisut takkunnissaat ilimaginngikkaluarakku, Nuka Bisgaard oqarpoq.

Nuka Bisgaard nunatsinni Gay Pridemik ingerlaaqatigiinnerit siullersaannik Nuummi 2010-mi aaqqissuisuuvoq. Nunatsinnilu suiaqatinoortut isigineqarnerat taamanimiilli allanngorujussuarsimanerarpaa.

-  Kalaallit Nunaat ukiut tallimat matuma siorna suiaqatinoortunik uumissuiffiunerpaat ilaattut isigaara. Piffissallu taama sivikitsigisup ingerlanerani pissutsit taama allanngortiginissaat taamani takujuminaatsippara. Isumaqaraluarpungami ukiunik 20-nik 30-nilluunniit sivisussuseqassasoq, Nuka Bisgaard oqarpoq.

Aamma unnuakkut illoqarfimmi qiimasuttut akornanni uumisaarisoqartarneranut annersaasoqartarneranullu tunngatillugu pissutsit allanngorujussuarsimapput.

- Siornatigummi qitseraasoqarlunilu ilaatigullu annersaasoqartarpoq, qisuariarfigineqassananilu.

- Maanna ammanerusumik namminerlu kissaatigisamik pissusilersortoqarsinnaavoq.

Tamatigulli taamaanngilaq.

- Nuummi akuerineqarnerani angineruvoq, sinerissamili akuerisaavallaannginnera maluginiarpara, Nuka Bisgaard taama naggasiivoq.