Mozambiquemi anorersuarujussuarnerani 1000-t sinnerlugit ajunaarsimassangatinneqartut

Afrikap kujasissortaani nunat marluk Mozambique Zimbabwelu kiattup anorersuarujussuanit Idaimit eqqorneqarput, ajunaarsimasullu amerliartuinnarput, inuit tuusintinit amerlanerusut ajunaarsimasut nalunaarutigineqarluni.
Assi © : Google Maps
Allattoq Ritzau
marsip 19-at 2019 11:22

Mozambiquep præsidentia Filipe Nyusi tuluit nutaarsiassaqartitsiviannut Reutersimut taama oqarpoq.

- Ajunaarsimasutut nalunaarsorneqarsimasut 1000-init amerlanerulernissaat ajoraluartumik naatsorsuutigisariaqarpoq, Filipe Nyusi oqarpoq.

Kiattup anorersuarujussuup Idaip Mozambiquemut anngunnerani Mozambiquemi ajunaarnersuaqarpoq, Mozambiquemilu ukiut qulit sinnerlugit ingerlaneranni aatsaat taama sakkortutigisumik anorersuarujussuartoqarlunilu sialussuartigaaq.

AAMMA ATUARUK Mozambiquemi Zimbabwemilu anorersuarujussuarnerani aseruatiternerpassuit

Mozambiquemi illoqarfiit annersaasa ilaanni Beirami illut 90 procentiisa missaat aseruatitersimapput.

- Aseruatiternerit ingasapput. Attaveqaqatigiinnermut atortut kipineqarluinnarsimapput, aqqusernillu atorneerullutik. Najugaqarfiillu ilaat suli tikinneqarsinnaanngillat, ikiuiniaqatigiiffiit International Røde Kors Røde Hlavmånelu ataatsimut taama nalunaaruteqarput.

Mozambiquemi Zimbabwemilu ulluni tulliuttuni siallingaatsiarnissaa silasiortut aarlerisaarutigaat.