Mount Everestip matuneqarnissaa Kinap piumasaraa
Olympiademi unammersuartoqarnissami aggustip qaammataani Bejingimi ingerlanneqartussami nunarsuarmi qaqqat portunersaani akerliussutsimik takutitsisoqannginnissaa Kinami aqutsisut anguniarpaat.
Himalayip qaqqartaani Kinamut sammisortaani qaqqasiorneq maajip ulluisa qulingata tungaanut matoqqatinneqarpoq, Nepalimilu pisortat tamanna malinniarpaat.
Olympeadeqartoqarnerani inneq ikumatitaq Mount Everestimiinnerani inuit qaqqamiinnginnissaannik Kinamiut Nepalimiunut piumasaqaateqarlutik allagaqarput. Qaqqasiortartut Mount Everestip qaqqaata Nepalimut sammisortaani maajip ulluisa aallaaqqaataaniit qulingata tungaanut qaqqamut majuaqqusaanngillat, Nepalip takornariaqarnermut ministeriat Prithvi Subba Gurung nutaarsiassaqartitsivimmut AFP oqarsimaneragaavoq.