Nunanit allanit

Mount Everestimi kisimiilluni qaqqasiorneq inerteqqutaalissaaq

Inatsisip sukateriffigineqarneratigut qaqqasiortarnermi ajunaartartut ikilisinniarneqartut, Nepalimi atorfilittat nalunaarutigaat.
Assi © : shrimpo1967 (original post at Flickr: Bhutan Card 02 085)(https://creativecommons.org/licenses/by-sa/2.0)
Allattoq Bikki P. Kleist, Anton Gundersen Lihn
decembarip 30-at 2017 14:24

Nunarsuarmi qaqqat portunersaanni Mount Everestimi kisimiilluni qaqqasiortarneq Nepalimit inerteqqutigineqalerpoq. Qaqqani allani aamma qaqqasiorniartut aatsaat ingiaqateqaqqaarlutik qaqqasiorsinnaalerput.

BBC arfininngornermi taama allaaserisaqarpoq.

Inatsisip sukateriffigineqarneratigut qaqqasiortarnermi ajunaartartut ikilisinniarneqarput sillimaniarnerlu annertusarneqarluni, Nepalimi atorfilittat tusagassiorfinnut taama ilisimatitsipput.

Taamatuttaaq tappiitsut illuttullu nioqanngitsut malittarisassat nutaat naapertorlugit qaqqasiorsinnaajunnaarput. 

Mount Everestimut qaqqasiorusuttorpassuit ukiut kingulliit aatsaat taama amerlatigipput.

BBC naapertorlugu Mount Everestimut inuit qaqqasioraluartut arfinillit ukiormanna ajunaarsimasimapput.
Ajunaartuni ilaavoq, 85-inik ukiulik, Min Behadur Sherchan, taanna utoqqaanerpaatut nunarsuarmi qaqqani portunersamut qaqeriaraluarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq