Motzfeldtip Tartupaluk isumaqatiginninniutiginiarpaa

Naalagaaffiit Peqatigiit New Yorkimi ataatsimeersuarnissaanni, qeqertaq Kalaallit Nunaata Canadallu akornanniittoq saqitsaassutaaqisorlu, Tartupaluk, Hans Ø, Kalaallit Nunaata, Danmarkip Canadallu ataatsimiissutigissavaat.

Danskit Canadamiullu nunanut allanut ministerii, Per Stig Møller, aamma Pierre Pettigrew, aningaasaqarnermut nunanullu allanut naalakkersuisup, Josef Motzfeldtip, ataasinngorpat septemberip 19-ianni ataatsimeeqatigissavai.

Naalagaaffiit Peqatigiit ataatsimeersuarnissaata arfininngorpat ammarneqassaaq, tassanilu Josef Motzfeldt peqataassaaq.

Ataatsimeersuarneq nunat tamat peqataaffigisaannik oqallinnermik aallarnerneqassaaq, nunat ilaasortaasut amerlanerit politikkikkut tunngassuteqarnerusunik saqqummiussaqassallutik.

Nunat EU-mi ilaasortanngorlaat arlallit Josef Motzfeldtip aamma ataatsimeeqatigissavai, nunatta EU-mut attaveqarnera, maannalu EU-mik isumaqatiginninniarnera pillugit ilisimatitsissuteqassalluni.