Motzfeldt: Paavip sulilluarsimanini eqqaamaneqaatigissavaa

apriilip 03-at 2005 13:22

Paavi Johannes Paul aappaannik ilassinnissimasut ilagaat, inatsisartunut siulittaasoq naalakkersuisunullu ukiorpassuarni siulittaasuusimasoq Jonathan Motzfeldt. Kalaallit Nunaata EF-mit anineranut tunngatillugu naalagaaffiit EU-mi ilaasortat siuttuinnik Romamut 1982-imi oqaloqateqariartorsimavoq.

- Paavimut iserama ambassadørimit ilisimatinneqarpunga, minutsit pingasut isersimassasunga. Kisianni paavimiippunga minutsit qulingiluat sekundillu 53-it. Jonathan Motzfeldt oqaluttuarpoq.

Paavip nunatsinnut tunngasunik paasisaqarumassusia tupigusuutigisimavaa, nunatta angissusaa nunalu qanoq annertutigisoq sermimit qallerneqarsimasoq paavip ilaatigut paasisaqarfigiumasimallugit.

- Aamma tupilammik tuttup nassuianik sanaamik tunissuteqarfigaara, nassuiaapparalu, kuisimanngitsuugallaratta akeqqanut sernissuutiginiarlugu atorniarlugulu atorneqartarsimasoq. Nassuiaavoq.

- Inussiarnerpoq, pingaartorsiornanilu inuppalaartumik oqaluppoq. Aamma oqaloqatigiinnerput annertunerusumik tusarnaarnermut atorpaa, malunnartumik tikeraartuunera ataqqerpasillugu. Jonathan Motzfeldt taama oqarpoq.

Paavip ippassaq toqunera tusarlugu alianartutut nalilerpaa, paavip sulinermini Europami inuit imminnut paaseqatigiinnissaannut suliaqarsimanera pillugu.

- Aamma taanna eqqaamaneqaatigissavaa. Jonathan Motzfeldt erseqqissaavoq.