Motzfeldt: Arajutsisitsilluni aktianik tunisineq pissusilunneruvoq

Vestjysk Bankip Grønlandsbankillu aasaq kattutinngitsoornerisa kingunerisaanik Danske Bankip Grønlandsbankimi piginneqataassutsini tamakkerlugit tallimanngormat tunivai. Danske Bankillu nunatsinni piserusuttoqarsinnaanera taamanernilli nalunngikkaluarlugu Danmarkimut Savalimmiunullu tunisisimanera niueqatigiinnermi pissuserissaarnertut nalilerneqarsinnaanngitsoq, aningaasanut naalakkersuisoq Nunafondillu (Grl.bankimi piginneqataasup) siulittaasua Josef Motzfeldt oqarpoq.

Piginneqatiginnissutit qanoq pineqassanersut pillugit Danske Bank Nationalbankilu isumaqatigiissuteqarfigineqarsimapput tuniniaasoqassappat ukioq naatinnagu ataatsimeeqateqatigiinnissamik.

-Taamaattumik ileqqorissaarnissaq pillugu piginnittut annerit qanoq iliornissaminnik nalinginnaasumik ilisimatitsisarmata Danske Bankip matumani kalerreeqqaarnani tunisisimanera kusananngitsutut nalilerpara, Josef Motzfeldt oqarpoq.

Naalakkersuisut ilisimasaqannginnerat Danske Bankimi pisortap tulliata Jakob Brogaardip tupigusuutiginerarpaa. Erseqqissaatigaa Nunafondip, Nationalbankip Danske Bankillu piginneqatigiinnertmut isumaqatigiissutaat qaammatit aqqaneq-marluk matuma siornagut atorunnaarsinneqarmat Josef Motzfeldt oqaloqatigisimallugu, tuniniaajumaarlutillu erseqqissaatigisimagitsik. Aamma oqarpoq, tuniniaaneq pillugu arlaleriarluni oqartoqartarlunilu allaaserinnittoqartarnera Josef Motzfeldtip ilisimasaqarfigisimassanngippagu tupigalugu.