Motorimik unittoorneq alianartumik kinguneqarpoq
- Ipilluni ajunaarpoq, tassa ajutoornermi ipilluni toquvoq. Umiatsiap motooriata uninneratigut kinngunermi angut umiatsiamut imaluunniit qaarsummut apornermi kingorna ipivoq, taama Ilulissani Politiit ulluinnarni aqutsisuat Karl Vinther oqarpoq nassuiaallunilu angutit taakku marluullutik annanniutinik atallaarsuaqarsimasut, angutillu aappaa 45-nik ukiulik timimigut ajoqusersimanngikkaluarluni assut pisumit tupatsinneqartoq.
Annaassiniarneq silarlunneranit, nittaalleqattaarneraniillu ajornakusoortinneqartoq, Air Greenlandimi angallasinernut pisortaq Jakob Nitter Sørensen oqarpoq.
- Anorlernerani qulimiguullip aalanera pissutigalugu silaannarmi uninngatinniarnera ajornakusoorsimaqaaq, inuillu qaqinniarneranni ilungersunartorsiutaalluni, Jakob Nitter Sørensen oqarpoq.
Mallit qaarsummut qaartarneratigut serpalittaasoqangaatsiarsimavoq, qulimiguulillu serpalitsinnginniassammat qutsissumiit annaassiniartariaqarsimapput, annaassiniartartullu ajoqusersimasunik ikiuisinnaasut silarlunnera peqqutigalugu ningissinnaanngilaat.
Angutit marluk Nuummiit Upernavimmut angallammik 27 fodsimik nutaamik angallassingaluarput, sillimaniarnermullu atortorissaaruteqaramik umiatsiap motoria unimmat Aasiaat Radio attaveqarfigisinnaasimavaat.
- Angut 45-nik ukiulik oqaloqatigeqqittussassuarput, angalanermi pisut paasisaqarfiginerorusullugit, politiilli misissuinerat naammassereerpoq, Karl Vinther oqarpoq.
