Motorcykelit eqqussorneqarnerat ammaateqittariaqaraluarpoq
Nunatsinni illoqarfinni anginerusuni angallanneq - pingaartumik ullaakkut - ajornakusoortaqaaq, tamannalu motorcykelinik eqqussuisinnaanerup aammaateqqinneratigut aaqqinneqarsinnaagaluarpoq, motorcykelinik nuannarisalik oqarpoq.
Kalaallit nunatsinni motorcykelinik eqqussisinnaaneq sanasinnaanerlu inerteqqutaavoq, tamanna illoqarfinni anginerusuni iluaqutissatsialassuugaluartoq ammaanneqartariaqaraluartorlu motorcykelinik nuannarisaqarluartoq oqarpoq.
Imaanngilaq pinngitsuunngivilluta motorcykeleqartariaqartugut, kisiannili qinikkat eqqarsaatigisariaqalerpaat angallasseriaaseq nutaaq, tassami ullaakkut suliartornerup nalaani biilerpassuit ataasiinnarmik ilaasoqartut ingerlasarput ingerlaniarnerlu ajornartilluinnartarlugu, massakkut eqqarsaatigisariaqalerpoq aamma knallertinik, scooterinik imaluunniit motorcykelinik ingerlasinnaanissaq.
Juunip aallaqqaataani 1980-imi foketingimi inatsisiliortoqarpoq aatsaaginnaq taariikkamik unitsissisumik.
Tassa motorcykeli allatuulli angallataavoq, soorlu biilit, knallertit timmisartut, cykelillu taamaattut, kisiannili 1980-ikkut aallartilaarnerani eqquseqqusaajunnaarnermut tunngaviusoq tassaavoq inuit ataasiakkaat sukkalisaarnertik pissutigalugu ajunaartarsimanerat, imaanngilaarmi soorlu qanittukkut biilerlutik sukkalisaartut ajunaarput, tamassumalli kingunerinngilaa biilinik eqqussuinerup unitsinneqarnera.
Motorcykelit nunatsinni angalasut juunip aallaqqaataa 1980 sioqqullugu eqqunneqarsimapput. Illit tusarnaartoq isumaqaruit kalaallit motorcykelertalernissaminnut periarfissinneqartariaqartut nittartakkami misissuinermut nalunaarsinnaavutit. Misissuineq knr.gl-imi takusinnaavat.
