Motorcykeliliortoqartassanngilaq
Motorcykelinik Kalaallit Nunaannut eqqussuisoqartassanngilaq, Inatsisinik atortitsinermut naalakkersuisoq, Jørgen Wæver Johansen, oqarpoq.
Apeqqut taanna Demokraatineersup, Lene Knüppelip, naalakkersuisunut qaammat kingulleq saqqummiuppaa, motorcykilit pillugit oqallittoqalermat.
Naalakkersuisut isumaat malillugu motorcykelit ataatsimut isigalugit suli Kalaallit Nunaanni angallannermi atugassatut nalequtinngillat, aammalu toqusimasut amerlassusaat amiilaarnaannartut, imaqarniliap immikkoortuisa 41-anni taaneqartut eqqarsaatigissagaanni Naalakkersuisut isumaqanngillat inerteqquteqarnerup taamaatinneqarnissaa pisariaqassasoq.
Ilaatigut taama tunngavilersuilluni Inatsiseqarnermut naalakkersuisoq Jørgen Wæver Johansen motorcykilit eqqussuunneqarsinnaannginnerannut sanaartorneqarsinnaannginnerannullu inatsimmik allannguiniarnerminnik Lene Knüppel-imut akissuteqarpoq.
Lene Knüppel naalakkersuisunut sapaatit-akunneri marluk matuma siorna apeqquteqarpoq, nunatsinni motorcykelinik eqqussuisinnanermut sanaartorsinnaanermullu inerteqquteqalerneq 1980-imi atuutilersoq allanngortinnialersaarneqarnersoq.
