Motoorillit akitsuusersuiffigineqarnissaat Vittup taamaatiinnarpaa

Akitsuusersuinissamut pilersaarusiat upernaakkut inatsisartut ataatsimiinnissaannut siunnersuutit innuttaasuniit akerlerineqarnera annertuallaarnera pissutaatippaa.

Pingaarnertut Royal Arctic Linemi assartuinermi akinik qaffaaneq pissutaasoq, Vittus Qujaukitsoq oqarpoq.

-Tamanna peqquteqarpoq qaammat kingulleq assartuinermik akinik qaffaanitta kingunerisaani naalakkersuisuniit isumaqaratta innuttaasut qaavatigut akitsuutitigut nanertuiffigeqqinnissaat pissusissamisoornavianngitsoq attanneqarsinnaanavianngitsorlu. Taamaattumik siunnersuutip tunuartinneqarnera tassannga peqquteqarpoq, Aningaasaqarnermut Naalakkersuisoq Vittus Qujaukitsoq oqarpoq.

Aningaasat 8-10 millionit koruunit akitsuusersuinikkut aaneqartussaagaluarput. Taakku aningaasat sumut aaneqassanersut misissuieqqissaartoqareerpat aatsaat paasineqassaaq.

-Maannakkut oqaatigisinnaanngilara aningaasat taakku suminngaanniit aassanerlugit. Kisianni qularinngilara piffissami aggersumi isertitassat aningaasartuutissallu isumaqatigiinniutigineqalerpata taakkua aningaasat nassaarissaqqaarigut, Vittus Qujaukitsoq oqarpoq.

Motoorilinnut akitsuusersuinissamut siunnersuut siunnersuutissatut saqqummiunneqarnermi kingorna tusarniaanermilu assut isornartorsiorneqarsimavoq. Illuatungiliuttut isornartorsiuisullu siunnersuut itinerusumik misissoqqissaarneqartariaqartoq tikkuartuisimapput, aamma motoorilinnut akitsuutinik qaffaaneq kingunerlutsitsissasoq tikkuartorsimavaat.