Mossaoui Frankrigimi parnaarussaali!
Zacarias Mossaouip arnaataa kissaatigaa, ernermi Frankrigimi parnaarussaanissaa.
Mossaouip arnaata eqqartuussissuserisua taama nalunaarpoq.
Mossaoui franskiuvoq Marokkomiit kingoqqisoq, inuunermilu sinnnerani parnaarussaanissaa USA-mi eqqartuussivimmi ippassaq unnukkut aalajangerneqarpoq.
Mossaouip arnaata, Aisha el-Wafip, eqqartuussissuserisuni aqqutigalu Frankrigimi oqartussaasut saaffigeqqusimavai, ernini Frankrigimi parnaarussivimmiissinnaannginnersoq, namminermi tamaani najugaqarami.
Mossaaouip Amerikami naalagaaffiit ilaata Coloradop illoqarfiisa ilaanni Florencemi parnaarussivimmiinnissaa ilimagineqarpoq. Parnaarussivik isumannaaqisoq taanna Rocky Mountainip Alcatrazianik taaneqartarpoq.
New Yorkimi Washingtonimilu ukioq 2001-imi septemberip ulluisa aqqarnganni peqqarniisaarnermi Mossaaoui peqataasimasutut ippassaq eqqartuunneqarpoq. Arnaa isumaqarpoq, oqaatsini pillugit – qanoq iliorsimaninilu pissutiginagu- taama sakkortutigisumik pillaatisisoq.
