Moskvami tuniluunneq killilersimaarniarlugu sapaatit akunnerani sulisoqassanngitsoq

Moskvami sapaatit akunnerisa naanerat takisooq ullunik qulingiluanik sulinngiffeqarfiussasoq, borgmesteri paasissutissiivoq.
Ruslandimi illoqarfiit pingaarnersaat, Moskva. Assi © : Jaime Silva/Flickr Creative Commons
Allattoq Ritzau
juunip 12-at 2021 12:44

Moskvami covid-19-ip tunillaassuunnera annikillisinniarlugu sapaatit akunnerata tullia tamaat sulinngiffiussaaq.

Ruslandimi illoqarfiit pingaarnersaanni borgmesteri, Sergej Sobjanin, arfininngornermi taama nalunaarpoq.

- Tunillaasuunneq unitsinniarlugu inuillu inuunerat annaanniarlugu nalunaarut ullumi atsiorpara. Atuutilersitara tassaavoq aningaasarsiaqarluni juunip 15-niit 19-nut sulissannginneq, borgmesteri pisortatigoortumik allaaserinnittarfimmini taama allappoq.

Russit ataasinngorpat sulinngittussaareerput. Ullumikkut arfininngornermi inuiattut ullorsiorput, tassungalu atatillugu sulinngiffissartik ataasinngornermut nuuppaat.

AAMMA ATUARUK Norilsk Ruslandip Issittumi illoqarfiini pingaarnersaaniartoq

- Moskvami taamaalilluni sapaatit akunnerisa naanerat takisooq ullunik qulingiluanik sivisussuseqalerpoq. Juunip aqqaneq-aappaanniit juunip 20-at ilanngullugu, russit nutaarsiassaqartitsiviat, Tass, naapertorlugu borgmesteri taama oqarpoq.

Sulisut sulinnginnissaannut ilassutitut imerniartarfiit neriniartarfiillu tamarmik unnukkut aqqanermut matusassapput.

Aalajangiinerli tamanna peqatigiiffinnut illoqarfimmi angallattunik suliaqartunut atuutinngilaq, aamma sakkuttut suliinnassapput.

Moskvamili sulisartut sinneri sulinnginnerminni akilerneqassapput.