Moskvami toqutsinerpassuit
Moskvamut ukiormanna siornatigut rekortiusimasunik qaangiiffiuvoq. Matumani pineqanngillat issinnerpaanera imaluunniit pølsi takinerpaaq – matumanili pineqarput toqutsinerit. Manna tikillugu inuit 1000-it sinneqartut russit illoqarfiisa pingaarnersaanni toqunneqarsimapput.
Moskva-mi siorna toqutsinerit 1016-iusut ukiormanna qaangerneqassagunarput.
Taamaattorli Moskva 11 millionit missaannik inulik, nunap sinnerani toqutsinerit 23.000-iusut eqqarsaatigissagaanni, inuuffigissallugu ulorianarpallaanngilaq. Tassunga ilanngullugu oqaatigisinnaavarput Rusland 150 millionit missaannik inoqarmat.
Toqutsinerit amerlanersaat angerlarsimaffinni pinngikkaangamik ikinngutit ilisarisimasallu akornanni vodkatorsimanerup kinguneranik pisarput taamaattumillu toqutsinerit paasineqalertortarput.
Toqutsinerit 3.500-t missaanniittut suli paasineqanngillat immaqalu paasineqarnaviaratik. Taakkuami akilersillutik toqutsisartunit suliaapput. Assersuutigalugu aviisiliortoq Anna Politkovskaja ungasippallaanngitsukkut taamatut toqunneqarpoq.
Toqutaanissaa kia kissaatigisimaneraa eqqoriarneqarsinnaavoq, kisianni toqutsisup nassaarinissaa ajornarluinnarpoq.
Moskvami ukiormanna toqutsinerit 1000-iusut Amerikami illoqarfissuarmut New Yorkimut amerlaqataannik inoqartumut sanilliutissagutsigik, tassani toqutsinerit ukiormanna 550-iupput.
Toqutsinerit amerlassussaat Danmarkimut, Moskvap innuttaasa affaannaannik inoqartumut sanilliukkutsigik, taava Danmarkimi toqutsinerit ukiumut 50-it missaanniittarput, tamarmillu paasineqartarlutik.
Danmarks Radio-p tusagassiortua Poul F. Hansen Moskvamiit taama nalunaarpoq.