Moskvami qimuttuitsuni qaartitsisoqarpoq
Ruslandimi illoqarfiit pingarnersaanni Moskvami qimuttuitsut nunap iluatigoortut unittarfiini marluusuni, ullaarmanna qaartitsisoqarneratigut inuit 40-t missaat ajunaarput.
Allattoq Elisa Isaksen
marsip 29-at 2010 04:56
Oqartussaasut oqaatigaat arnat marluk imminnut pilliutigalutik minutsinik 45-nik akuttussusilimmik marloriarlutik qaartitsisimasut.
Qaartitsinernit toqutaasut maannamut 37-unerarneqarput ikinnerpaamillu 38-t ajoquserneqartut, nutaarsiassaqartitsivimmit AP-mit nalunaarutigineqarpoq.
Qimuttuitsut unittarfii taakku marluk Moskvap qiterpasissuaniipput, aamma Russit isertortumik paasiniaasarfiat, qaartitsiffigineqartup aappaata eqqannguaniippoq.
Ullaaq manna qaartitsinernut akisussaasunik suli nalunaartoqanngilaq. Taamaattorli muslimit ingasattajaarlutik pikitsitsiniat, Kaukasusip avannarpasissuaneersut qaartartumeerinernut akisussaasutut pasitsaanneqartut, nutaarsiassaqartitsivimmit Reutersimit allaaserineqarpoq.
